الفقرة اللي بالابيض فيها سبويلرز/حرق

أول حاجة نبدأ بالقصة وشخصياتها والبرزنتيشن بصفة عامة. تقريبا حبيتهم كلهم بدرجة ما توصف. القصة والميثلوجيا حقت اللعبة كانوا مرة مترابطين وراكبين مع بعض، حتى التويستات اللي صارت كانت مرتبطة بشكل أساسي بميثلوجيا اللعبة ولها تفسير منطقي واضح. حركة الفلاش باكز و الـ13 يوم كانت تربط الأحداث بشكل رهيب. اللعبة تبدا محيرة بالقصة وبعدها تربط كل شي ويجيك دايزلي يزيد الحماس ويكملها رينز في التشابتر اللي بعده ويفجرها. القصة كانت ماشية تمام.الشخصيات ما يحتاج أمدح فيهم، أبدا ما في شخصية أهملوها. كل شخصية خلوك تشوف القصة من منظورها، كل شخصية جابوا الباكجراوند حقها، كل شخصية فسروا لك معظم تصرفاتها. جابوا لايتننج جاحدة ساز في البداية ولا هي مهتمة فيه، ويجيبون لك مشهد في الـ13 يوم يوريك السبب. ساز هو اللي جا مع لايت وهي ما كانت تبيه معها. فانيل كانت تسأل أسئلة غبية وساز استغرب وقال بما معناه”what are they teaching kids in shcool these days”. السبب ان فانيل من بولس وطبيعي ما تعرف شي عن كوكون. الحلو بعد ان الشخصيات كلها تتأثر بالأحداث اللي تصير، ساز يأس وكان على وشك الانتحار، لايت من بنت مطنشة كل شي وهمها أختها إلى بنت متفهمة ومتعاطفة. سنو ومشاهده في تشابتر 7 و10 بعد ما عرف سالفة سارا وكيف تأثر. هوب من ولد دلوع خواف إلى واحد عنده أمل وحاط عنده هدف أساسي يبي ينجزه مهما كان. صعب أتكلم عن الشخصيات كلها باللي صار لها والقصة بعد، لكن ذكرت ايش اللي أعجبني مع أمثلة.

رتم اللعبة السريع ممتاز جداً جداً بالنسبة لي. هذي أول اربيجي أقدر ألعب فيها 4 ساعات متواصلة في “كل جلسة” كحد أدنى. أي لعبة اربيجي ثانية كنت ألعب 4 ساعات في جلستين كحد أعلى. أكثر حاجتين يهموني في أي لعبة هي الجيمبلاي وبعدها القصة والعناصر الثانية. اللعبة تخليني ألعب طول الوقت بدون فترات انقطاع طويلة، طول اللعبة فترات الانقطاع قليلة مرة وما في الحاجة اللي كانت تجيب الملل والهم والغم ، الراندوم باتل. دخلت جو مع كثرة المعارك وبعدها الكتسينز، القصة كلها سريعة واللعب سريع والرتم سريع. وأنا ألعب اللعبة رجع لي شعور انتشارتد وماريو جالاكسي، اللي هو لما أمسك اللعبة ما أقدر أفكها.

نجي للعنصر الأهم اللي هو الجيمبلاي. الباتل سستم في الجزء هذا ما يحتاج أمدحه. كل حاجة جديدة سووها كانت ناجحة وأثر على اللعبة بشكل إيجابي. إلغاء الـMP كان أحسن حاجة سووها، تخفيف مناعة الوحوش ضد الأمراض + في حالة عدم نجاح المرض ياكل العدو دامج، امتلاء الـHP بعد كل معركة. هذي الأشياء كلها خلت الأعداء يهاجمون بقوة، ياخذون راحتهم في أنواع الضربات والأمراض، يعززون أنفسهم. كل هالأشياء خلتك تستغل الباتل سستم تمام، البارادايم شفت اللي هو أساس استراتيجياتك، ما تقدر تهمله أو تتجاهله لفترة من اللعبة وتفوز، حتى ضد الوحوش العاديين محتاج الشفت. ما اذكر احتجت الماتيريا والجنكشن والابيليتيز بالشكل هذا من قبل، فعلا زيادة قوة الوحوش والصعوبة في الجزء ذا حسستني بفايدة كل شي. بعد الأسحار صحيح انها أقل لكن اغلبها مفيد، أحسن من انهم يحطون اسحار كثيرة 90% منها ما له فايدة بأي شكل من الأشكال. فف13 حسستني بفايدة الأمراض والتعزيزات، الأمراض من قبل كانت عبارة عن سحر يشفط أبو الـMP وبالموت ينجح واذا ما نجح تضيع الـMP على الفاضي، ما يمديه ينجح الا الـMP على وشك يخلص وفوق كذا الوحش ما يستاهل تستعمل عليه المرض هذا لانه يموت بالأتاك العادي او بإلمنت ماجيك وخلاص، ولا يشكل عليك خطر كبير حتى.

البارادايم شفت ونظام 3 رولز/جوبز لكل شخصية أكثر من ممتاز، كل شخصية لها أكثر من رول وتبدل بينهم بسرعة أثناء المعركة، فوق كل هذا لما تحول رول الشخصية تظل محدود بالرول اللي تستعمله الشخصية، يعني ما تقدر تستعمل الثلاث رولز في وقت واحد وهالشي حافظ على الوزنية والاستراتيجيات وأضاف تنويع بين الأساليب في المعركة من دفاع إلى هجوم إلى علاج ….الخ.

الكريستاريوم أقدر اسميه سفير جريد مطور….هو فعلا سفير جريد مطور (&). هنا الخيارات أكثر، مع كل نقاط تحصلها تقدر تختار في أي لوحة تبي تطور نفسك، وكل لوحة مخصصة لرول معين. وزيادة على كذا في لفل كاب في اللعبة، مهما لفلت بيوقف لفلك لين ما تمشي بالقصة. الشي هذا حافظ على وزنية اللعبة في كل شي.

نظام الإكوبمنت في اللعبة والاكسسوارات مفيد وبسيط. الاكسسوارات هي اللي بتاثر بشكل كبير على الستاتس. ولو تلاحظون في اكسسوارات مخصصة للوحوش العاديين، زي الاكسسوار اللي يعبي جزء ATB بعد قتل أي وحش، هذا ما له فايدة مع الزعماء. تقدر تستعمل الاكسسوارات بعد ما تحدد ايش نقاط قوة الزعيم، وتستعمل الاكسسوارات المناسبة لها. نظام تطوير الأسلحة وضع لمسترة اللعبة، تقدر تطورها وتستفيد منها لكن مش بذيك الأهمية. لكن بعد الختمة وبطئ التلفيل بتحس بفايدتها.

مستوى الصعوبة في اللعبة فيه تحدي، اللعبة مش صعبة ولا سهلة. اقدر اشبهها بتحدي انتشارتد مثلا، تموت كم مرة وتبدا تفهم وتعرف ايش تسوي وتفوز، لكن الفوز ما يكون تطبيق أعمى. كذا انتشارتد وكذا فف13 من ناحية مستوى الصعوبة.

الجيمبلاي في اللعبة بالنسبة لي بيرفكت ونص. حاجة ممتعة بشكل رهيب جدا جدا. حسيت بأهمية كل شي متوفر، لأن له فايدة. عكس اللي كنت اشوفه في الأجزاء القديمة، كل حاجة تتخلص بـattack – elemntal magic – cure وما تفرض عليك تستعمل غيرهم الا ضد 3 زعماء طول اللعبة. القدرات المتوفرة موجودة لأنك راح تستعملها، مش عشان تكون موجودة وتتفرج عليها.

الأوست فاجأني، ما توقعت هامازو يقدر على الشغل هذا. التراكات كلها متنوعة ما عدا كم ريمكس لثيم المنيو وثيم الباتل، تقريبا 4-5 ريمكسات لثيم المنيو و3-4 ريمكسات لثيم الباتل. الباقي جدد ومختلفين زي snow’s theme, hope’s theme, sustained by hate, dust to dust, primarch dysley, desperate struggle, fighting fate, born anew, eidolons , mysrties abound. فف13 اكثر جزء علق تراكات في ذهني.

باقي الأشياء من جرافكس وغيره ما تهمني، فما أحتاج أتكلم عنها. أنا انسان اخر همي الجرافكس.

فف13 لعبة love or hate. ولاحظت ان الاغلب مختلف على كم شي، اذا اعجبوك بتموت في اللعبة، اذا ما اعجبوك بتكره اللعبة او بتحبطك.

1- الرتم السريع، الرتم ما هو رتم اعتيادي للعبة اربيجي ياباني وهالشي ما حبه كل الناس.

2- الخطية، اذا انت تلعب ويسترن اربيجي او تكره الخطية اللعبة ما بتعجبك لان حالها حال فف10 من ناحية خطية.

3- القصة والشخصيات، هم ممتازين في الجزء هذا لكن كالعادة الناس تختلف من الناحية هذي في كل جزء وفي ناس تكره اللعبة بسبب قصتها وشخصياتها (&).

4- انت نوب، زي ما صار مع فف8 وفي ناس واجد كرهوها بسبب التعقيد، فف13 في ناس بتكرهها بسبب انها صعبة عليهم، اللعبة مش صعبة لكن اتكلم عن الناس اللي كانت تلعب الاجزاء القديمة من فف وتشوف انها صعبة.

انا كشخص يحب الرتم يكون سريع، ما عنده مشكلة مع الخطية ( لعبتي المفضلة قبل فف13 كانت فف10 وكل وحدة تقول الخطية عندي )، حب القصة والشخصيات كثير، مش نوب ومقطع الناس بالاحترافية >>> (&)

فاعتقد اللعبة تستاهل إني أعطيها التقييم اللي تحت، لانها بالنسبة لي ما فيها عيوب

تقييمي: 10/10

أفضل فف وأفضل لعبة لعبتها

ناس بتجي بتوافقني وناس تجي بتقول أبالغ، السبب هو الأربع نقاط اللي ذكرتها آخر شي.